Kuwa Gatatu, 24 Gicurasi 2023

Minisitiri Dr. NSABIMANA Ernest yagiranye ikiganiro n’abadepeti Komisiyo y’ubutaka, Ubuhinzi n’Ibidukikije aho yagarutse kuri gahunda ya leta mu gukemura ibibazo byagaragaye mu kubaka amacumbi aciriritse.

Muriki kiganiro NSABIMANA, yavuze ko hari gukorwa inyigo izagaragaza uruhare rwisumbuyeho Leta izagira muri iyi gahunda yo kubaka inzu zikodeshwa zakorohera buri wese, kugera ku mukozi uhembwa byibuza ibihumbi 60 ku kwezi.

Ku kibazo cy’ubutaka butabyazwa umusaruro kubyo bwari buteganyirijwe, Minisitiri yabwiye Komisiyo ko Leta yafashe umwanzuro wo kwisubiza ubutaka bwari bwarahawe ba rwiyemezamirimo, ngo bwubakweho amacumbi aciriritse ariko bakaba batarabikoze

Ati “Leta yafashe umwanzuro wo kwisubiza ubutaka yahaye abo bashoramari batashoboye kububyaza umusaruro wari witezwe. Ubu bukaba burimo guhabwa abandi bashoramari n’ibigo bya Leta, bizakomeza kubwubakoho izo nzu ziteganyijwe”.

Minisitiri NSABIMANA avuga ko bamwe muri ba rwiyemezamirimo bari biyemeje gufatanya na Leta, muri gahunda yo kubaka amacumbi aciriritse batakomeje ibikorwa byabo, biturutse ku bushobozi buke bwa bamwe muri bo, ariko kandi hari abaje muri iyi gahunda yo kubaka inzu ziciriritse badafite amakuru ahagije, bituma badashobora kuzuza ibisabwa byose.

Mu bindi bidindiza gahunda yo kubaka inzu ziciriritse, hagaragaramo ubushobozi buke bw’abakeneye inzu, abashoramari batitabira, igiciro cy’ubwubatsi, n’icy’ibikoresho bitumizwa hanze cyazamutse n’ikoranabuhanga rikoreshwa mu bwubatsi rihenze, gusa Leta izakomeza gukorana n’abafatanyabikorwa mu gushakira umuti ibyo bibazo byose.